Plantun de Prouvènço

Pèr coumpara dos planto d'encò nostre

Hornungia alpina & Scleranthus annuus

Hornungia alpina

Brassicaceae Cruciferae

Noms en français : Cresson de chamois, Cresson des chamois.

Descripcioun :
Lou creissoun-de-chamous trachis dins lis esboudèu fres e li coumbo à nèu de mountagno sus cauquié. Se recounèis à si grapo de pichòti flour blanco e à si fueio coumpausado de 2 à 6 paréu de "fueioun". La siliculo, negro, fai de 3 à 6 mm. La subsp. dis Aup de Prouvènço, ié dison alpina .

Usanço :
Couneissèn pas d'usanço particuliero pèr aquelo planto. Dèu èstre manjadisso, mai avèn pas d'entresigne segur. Escriéure au site se n'en sabès mai.

Port : Erbo
Taio : 3 à 10 cm
Fueio : alterno
Tipe bioulougico : Camefite
Cicle bioulougico : Planto renadivo

Gènre : Hornungia
Famiho : Brassicaceae
Famiho classico : Cruciferae

Ordre : Brassicales

Coulour de la flour : Blanco
Petalo : 4
Ø (o loungour) flour : 5 à 8 mm
Flourido : Printems - Estiéu

Sòu : Ca
Autour basso e auto : 1700 à 3000 m
Aparado : Noun
Mai à avoust

Liò : Esboudèu fres - Coumbo à nèu
Estànci : Subaupen à Aupen
Couroulougi : Ouroufito-Éuroupenco
Ref. sc. : Hornungia alpina (L.) O.Appel, 1997 (= Pritzelago alpina (L.) Kuntze, 1894 = Hutchinsia alpina (L.) R.Br., 1812 )

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.